२०८० चैत्र ०८ गते, बिहीवार ।

रैनादेवी छहरा गाउँपालिकाको आयोजना तथा युवा तथा खेलकुद विकास समितिको व्यवस्थापनमा सञ्चालन भएको चौथो रैनादेवी छहरा अध्यक्ष कप अन्तर पालिकास्तरीय पुरुष भलिबल प्रतियोगिता बिहीवार समापन भएको छ । समापन कार्यक्रमका प्रमुख अतिथि लुम्बिनी प्रदेश सभाका सभामुख माननीय श्री तुलाराम घर्ती मगर हुनुहुन्थ्यो भने कार्यक्रम गाउँपालिकाका अध्यक्ष रुक्माङ्गत भट्टराईको अध्यक्षता, उपाध्यक्ष युवराज थापा, प्रवक्ता देवेन्द्र पुन, वडाध्यक्षहरू, कार्यपालिकाका सदस्यरूको उपस्थितिमा सञ्चालन भएको थियो । कार्यक्रम सञ्चालन प्रमुख प्रशासकीय अधिकृत कृष्ण प्रसाद तिमिल्सिनाले गर्नुभएको थियो ।

प्रतियोगितामा रामपुर नगरपालिकाले प्रथम स्थान हासिल गर्दै नगद रु ७५,०००, रम्भा गाउँपालिकाले द्वितीय स्थान हासिल गर्दै नगद रु ४५,०००, पूर्वखोला गाउँपालिकाले तेस्रो स्थान हासिल गर्दै रु ३०,००० र रैनादेवी छहरा गाउँपालिकाले सान्त्वना स्वरुप रु १५,००० पुरस्कार र मेडल, ट्रफी हात पार्न सफल भएका छन् ।