२०७९ असार २०, छहरा।

आज एक कार्यक्रमका बिच रैनादेवी छहरा गाउँपालिकालाई पूर्ण खोप सुनिश्चितता पालिका घोषणा गरिएको छ। गाउँपालिकाको बैठक हलमा सम्पन्न कार्यक्रमको अध्यक्षता सामाजिक विकास समितिका संयोजक हुमान सिंह कार्कीले गर्नुभएको थियो र प्रमुख अतिथि गाउँपालिका अध्यक्ष रुक्माङ्गत भट्टराई तथा विशिष्ट अतिथि जिल्ला स्वास्थ्य कार्यालयका प्रमुख डा. राजेन्द्र कुमार गिरी रहनुभएको थियो। कार्यक्रममा प्रमुख प्रशासकीय अधिकृत राजीव पन्थी, प्रवक्ता देवेन्द्र पुन, वडाध्यक्षहरू सोम बहादुर दर्लामी, दान बहादुर पौडेल, प्रदिप पौडेल, हुमान सिंह कार्की, रेम बहादुर राना लगायत अन्य कार्यपालिका सदस्य तथा स्वास्थ्य शाखा/स्वास्थ्य चौकीका कर्मचारीहरु तथा सामुदायिक स्वास्थ्य स्वयंसेविकाहरुको उपस्थिति रहेको थियो।

गाउँपालिकालाई पूर्ण खोप सुनुश्चित बनाउन महत्वपूर्ण भूमिका खेल्नुभएका स्वास्थ्य चौकी प्रमुखहरू तथा सामुदायिक स्वास्थ्य स्वयंसेविकाहरुलाई सम्मान गरिएको थियो। जिल्ला स्वास्थ्य कार्यालयका प्रमुख डा. राजेन्द्र कुमार गिरीले गाउँपालिकाका अध्यक्ष रुक्माङ्गत भट्टराईलाई पूर्ण खोप सुनिश्चितता पालिका प्रमाण पत्र प्रदान गर्नुभएको थियो र रैनादेवी छहरा गाउँपालिका आगामी वर्षहरूमा पनि निरन्तर रूपमा पूर्ण खोप सुनिश्चित पालिका कायम हुने विश्वास व्यक्त गर्नुभयो।पालिका अध्यक्ष भट्टराईले यो उपलब्धि हासिल गर्न सहयोग गर्ने सम्पूर्णलाई धन्यवाद व्यक्त गर्दै जिल्ला स्वास्थ्य कार्यालय, सुआहाराका प्रतिनिधिहरूलाई सम्मान स्वरूप मायाको चिनो प्रदान गर्नुभएको थियो।

कार्यक्रममा ६० वर्ष पुगेर सेवा छोड्दै गर्नुभएका सामुदायिक स्वास्थ्य स्वयंसेविकाहरूलाई सम्मान गरिएको थियो र गाउँपालिका भित्र उत्कृष्ट हुन सफल जुठापौवा स्वास्थ्य चौकीलाई पनि सम्मान पत्र प्रदान गरिएको थियो। कार्यक्रमको सञ्चालन र सहजीकरण स्वास्थ्य शाखा प्रमुख जिबन रानाले गर्नुभएको थियो।